2016/06/21

Sari banaketa Apalategui kirolak dendan

Aurreko sarreran aurreratu bezala, Ander Suberbiolak irabazi du kirola sustatzeko helburu zuen IV. euslogan lehiaketa. Azpiko argazkian Ander ageri da, AEK-ko ordezkariaren eskutik Apalategui kirol dendak emandako 100 euroko erosketa-txartela jasotzen.


                                  "Mugi, bizi, goza; kirola bizi-poza"

Zorionak, berriz ere, Ander! Eta eskerrik asko Deportes Apalateguiri lankidetzagatik!

Datorren urtean beste gai batekin itzuliko gara. Aurreko edizioetan euskara, hemengo produktuak, landa-turismoa eta kirola sustatu ditugu. Eta zuk zein gai proposatuko zenuke?

2016/06/16

Mugi, bizi, goza; kirola bizi-poza

Goiko esloganak irabazi du IV. euslogan lehiaketa, epaimahaia osatu duten lau kideen puntuaketaren arabera. Egilea Irrintzi-AEK euskaltegiko C2 mailako Ander Suberbiola donostiarra izan da.
Zorionak!

Bada, horixe, nagiak atera eta... "Mugi, bizi, goza; kirola bizi-poza"


2016/06/13

Kirola sustatzeko esloganak

Guztira 43 eslogan jaso ditugu, iazko kopuruaren pare. Eskerrik asko parte hartu duzuen guztioi, eta adi egon, laster izango baitugu irabazlearen berri. Jasotako esloganen zerrenda duzue honako hauxe:


-Gorputzak mugitu, bihotzak alaitu!

-Kirolaz gozatu eta osasunaz blaitu.

-kirola gosatuz, bizitza sustatuz
-Kirola eginda, bizitza egina
-Kirola eginda, bizitza handitua
-Gora kirola!
-Bizi kirola!

-Ari-ari-ari, ekin kirolari!

-Ekin kirolari... eta trukean osasuna opari.

-Egizu kirola eta berritu odola!

-Kirola, ariketa baino gehiago.

-Igerian, bizikletaz, korrika... kirolaren irrika.

-Kirol egarria, izerdiaren gozagarria.

-Hautsi oskola eta egizu kirola!

-Egizu kirola urratuz zapata-zola!

-Aizu, potxola, egizu kirola!

-Mugi-mugi!

-Aktiba zaitez!

-Ibili eta ibili, atsedenik gabe.

-Egin kirola, “eso cómo mola”!

-Hala edo nola, egin dezagun kirola!

-Ekin kirolari, hori bai osasungarri!

-Eskubola, saskibola, futbolla, Mendiola... Aupa kirola!
 
-Kirola, bihotz-ola.

-Euskara jakitea eta kirola egitea, hau da bizipoza izatea!

-Bete bizitza taupadez kirola eginez.

- Utzi botila eta jantzi zapatila! 

- Bakarrik zein lagunekin, kirolari ekin. 

- Bota esprina eta kendu mitxelina. 

- Astindu giharra eta egin irrifarra. 

- Kendu nagia eta astindu ipurdia. 

- Utzi txakolina eta kendu mitxelina. 

- Egin ezazu dantza eta kendu zure gantza.
- Mugi, bizi, goza; kirola bizi-poza

- Zu ere kirolari, ekin kirolari!

- Ekin, kirolari!

- Kirola, osasun taupada

- Bizi kirolaren taupada

- Kirola: gozamena osasun

- Dabilen gerrian goroldiorik ez

- Kirola, bizi-arnasa.
- Hartu arnas; ekin kirolari!

- Eman arnas gorputzari


2016/05/18

IV. euslogan lehiaketa




Kirola sustatzeko esloganak bidali eta Apalategui Kirolak dendan 100 euroko erosketa-txartela irabazi!

  
Kirola sustatu eta saria eskuratu!

Donostiako AEK-k euskarazko eslogan lehiaketa antolatu du “iriki atia, donostiar euskaldun eta euskara ikasleen topalekua”ren ekintza osagarri moduan.

Euskarazko sormena lantzea du helburu; izan ere, erdaraz pentsatutako goiburu edo esloganak nagusi baitira egun publizitate arloan.

Lehiaketa honetan, kirola sustatzeko asmoa duten esloganak osatu beharko dira. 

Zer da eslogana edo slogana?

Jendearen arreta piztu eta erakartzeko esaldi laburra. Produktu edo ideia bati buruz pertsonek duten jarrera aldatu edo finkatzea du helburu.

I. lehiaketan euskararen erabilera bultzatzeko leloak asmatu behar ziren, eta ondokoak irabazi zuen: “euskararen giltza, elkarrekin mintza, ”. Bigarrenean, berriz, bertako produktuen kontsumoa sustatu nahi genuen, eta irabazleek hauxe sortu zuten: “Nahi baduzu gozatu, hemengo produktuak dastatu". III. lehiaketan landaturismoa sustatzea zen gaia eta "Ahokada bat haize, landetxean aise" esloganak irabazi zuen.

OINARRIAK:

1.- 2016ko maiatzaren 23tik ekainaren 12ra egongo da zabalik lehiaketan parte hartzeko epea, eta nahi adina eslogan bidali ahal izango dira.
2.- Esloganak euskara hutsean izango dira.
3.- Esloganek jatorrizkoak eta inon argitaratu gabeak izan behar dute.
4.- Gaia: esloganak kirola sustatuko du.
5.- Esloganak honako helbidera bidali behar dira: donostia@aek.eus honako datuak erantsiz: izen-abizenak, herria eta harremanetarako telefono zenbaki bat.
6.- AEKren Donostiako euskaltegietako zuzendariek eta AEK-ko komunikazio arduradunek osatuko dute epaimahaia. Epaia ekainaren 17an jakinaraziko dugu www.irikiatia.blogspot orriaren bitartez, eta apelaezina izango da.
7.- Saria: irabazleak 100 euroko bonoa irabaziko du Donostiako Apalategui kirol-dendan kirol-produktuen truke aldatzeko.
8.- Parte hartzaileek AEKri uzten diote, esklusiban, esloganak erabiltzeko eskubidea.
9.- Lehiaketa honetan parte hartzeak berez dakar oinarrion erabateko onespena.

2016/05/12

Maiatz-ekaineko saioak

Ikasturte honetako azken egitarauarekin gatozkizue. Ea zuen gustukoa den!

Eman izena beldurrik gabe! Animo!


2016/05/05

Bagerako bi saiotako irudiak
















Erleak eta erlazaintza
Apirilean Aitor Zabala erlezain pasaiarra izan genuen gure artean. Erleen gaineko hainbat bitxikeria kontatu zizkigun (bazenekien erle langileak 40 egunez bakarrik bizi direla eta erregin bost urtez bizi litekeela? Erleen artean ere pribilegioak ditu monarkiak...); horrez gain lau ezti mota dastatu ahal izan genituen, zein baino zein hobea!




Bertsolaritza
Hilabete lehenago, martxoan, Amets Arzallus hendaiarrarekin bertso-eskola txiki bat izan genuen. Hainbat bertso osatu genituen, hainbat doinu eta errimatan. Ondoko gaia jarrita, hurrengo bertsoa osatu genuen.

Gaia:
"Gaur zezenketen inguruko eztabaida bat entzun dut irratian, izenpedura bilketa bat egin dutela Donostian herri galdeketa bat antolatzeko zezenketei buruz. Galdeketa txiki bat eginen dugu hemen, eta aldeko edo kontrako bertso bat idatziko dugu."

Bertsoa:
Gure festa bat ezin da izan
zezenen sufrikario
horregatikan Donosti hontan
Illunbe horri adio
eta gainera ze xahuketa
dirua dela medio
ze miseria txalo ozenez
hartu beharra herio.

Tira, ez da Euskal Herriko txapelketa irabazteko modukoa, baina...

2016/02/18

Inauteriak eta bizikletak

Zer zerikusi dute inauteriek eta bizikletek?

Aurtengo Tolosako inauterietan Frantziako Tourraren parodia egin zuen koadrilla batek...













Baina ez dizuegu horren berri eman nahi; bai, ordea, atzo, otsailaren 17an, iriki atian izan genituen bi saioren berri.

Alde batetik, Patxi Miner hernaniarrak bizikleta punttuan izateko aholku interesgarriak eman zizikigun Bagera elkartean: balaztak eta aldagailuak nola doitu, gurpila zulatutakoan partxea behar bezala nola jarri, katea zenbatean behin aldatu behar den eta zein garrantzia duen garaiz aldatzeak, olioa eta koipea non bota... Kontuz! Ez bota sukaldeko oliorik kaltegarria baita!
Benetan oso mamitsua izan zen ordu eta erdiko saioa.
















Bestalde, Amara Berri-AEK euskaltegian "Inauteria, natura gizakiaren kontra" liburua aurkeztu zigun Edu Zabalak.
Egilearen iritziz, inauteria gizakiak naturaren kontra hastapenetatik daraman borrokatik sortua da, etengabeko borroka horren antzezpen errituala. Gizakiak gero eta gehiago meneratzen du izadia. Azken erronka heriotza gainditzea litzateke, hau da, hilezkortasuna lortzea. Horretarako gizateria beste aldi berri batean sartu beharko litzateke, energia unibertsalarekin bat eginez, ama-lurra errespetatuz eta etengabeko ekoizpenari behin betiko amaiera emanez. Bestela, natura izanen da gizakion epaile gupidagabea, beti gertatu den bezala.
Hauxe da Edu Zabalak ibilbide magiko-mitologiko honetan zehar agertzen digun teoria ausarta.


2016/02/12

Otsail-martxo-apirileko saioak

Kaixo, guztioi.

Hiruhileko honetako programazioa duzue hauxe. Gogoratu saio irekiak izanda ere, aurrez izena eman behar duzuela!

 

Inauteria, gizakia naturaren kontra

Edu Zabalak argitaratu duen inauteriaren oinarri zaharrei buruzko ikerlana hizpide izango dugu irudiez lagunduta.
Amarako AEKn, otsailaren 17an, asteazkena, 19:00etan

Bizikletaren mantentze-lanak

Patxi Minerrek gure bizikleta puntu-puntuan jartzeko aholkuak eman eta hainbat trikimailu erakutsiko dizkigu.
Bageran, otsailaren 17an, asteazkena, 18:30ean

Lore-bitxigintza

Lehenik, naturarekin lotura duten bitxigileak ezagutuko ditugu eta material naturalak bereganatzeko dituzten bideak aztertuko dugu. Ondoren, material naturalak itsasteko teknikak ikasita, besoan ipintzeko pultserak egingo ditugu.
Antiguako AEKn, otsailaren 24an, asteazkena, 09:30ean

Begiak irekita

Kubokutxako erakusketa honek Marta Cardenasen (Donostia, 1944) obrara bi atal handiren bidez hurbiltzea proposatzen du: Barrualdea eta Kanpoaldea.
Martxoaren 16an, asteazkena, 10:00etan
Martxoaren 17an, osteguna, 18:30ean


Bertsolaritza

Bertsoen nondik norakoak ezagutuko ditugu Amets Arzallus hendaiarraren laguntzaz, bai eta bertsoak osatu ere.
Bageran, martxoaren 16an, asteazkena, 18:30ean

Erleak eta erlezaintza

Erlemunduko lagunek erleek eta erlazaintzak polinizazioan eta naturan duten garrantzia azalduko digute, besteak beste, eta ezti gozoa dastatzeko aukera ere izango dugu.
Bageran, apirilaren 20an, asteazkena, 18:30ean

Emakumeak eta itsasoa

Untzi museoak berak produzitutako aldi baterako erakusketa honek emakumeek historian zehar itsasoarekin izan duten harremana jakinarazten dio jendeari.
Apirilaren 28an, osteguna, 15:30ean
Apirilaren 28an, osteguna, 18:30ean