2014/12/19

Suturak eta mundu zaintzaileak

San Telmon "Suturak" erakusketari egindako bisitaren erakusgarri, hona hemen pare bat argazki:






Bertan egungo euskal artista askoren lanak ikusi ahal izan genituen, garaiko gizarte gaiekin lotutatako lanak, hain zuzen:  generoa, gazteen emantzipazioa, bullyng-a, bandalismoa vs. artea, eta abar.


Bestalde, Ander Izagirrek "Mundu zaintzaileak" izeneko ikus-entzunezkoa eskaini zigun lau alditan AEK-k Donostian dituen hiru euskaltegietan. A zer gaindosia!

                                                  Antiguako AEKn



Anderren "Mundu zaintzaileak" liburuaren aurkezpenaren harira Maitane Aldanondok Irutxuloko Hitzan idatzitakoa ekarri dugu hona, merezi duelakoan.



Munduko txoko bat aukeratu eta beren indar, ahalegin eta dirua horretan jartzen dute. Meriturik eskatu gabe. Gunea maite dutelako, besterik gabe». Pertsona horiek betetzen dituzte Ander Izagirreren Cuidadores de mundos (Munduen zaintzaileak) azken liburuaren orriak. Bertan, kazetari donostiarrak izena jarri eta hitz egiteko aukera eman die ezer jasotzeko asmorik gabe lan hori beren gain hartzen duten zaintzaile anonimo horiei.
«Paisaia bat, haran bat, herri bat... Leku horiek politak dira, baina, horiek deskribatu ordez, pentsatu nuen hobe zela toki horietan zeuden bizitzak eta bizimoduak kontatzea». Entzunda zituen kontuak jarraituz, ingurukoei eta bestelakoei galdetuz pertsonaiak eta istorioak aurkituz joan zen.
«Istorio miresgarriak zirela iruditu zitzaidan, meritu handia zutela egiten zutenagatik, eta zabaltzea merezi zutela, esker on pixka bat jaso zezaten besteen aldetik». Bakoitzarekin egun erdi bat pasatzen zuen hizketan eta paseoan. Eremu txiki horiekin zein harreman zuten ikusi nahi zuen Izagirrek; leku batzuetan nola hunkitzen ziren, nola hitz egiten zuten... «Oso maitekor eta pasio handiarekin azaltzen zuten beren egitekoa, baina, normalean, oso umilak dira: ez diote garrantzi handirik ematen egiten dutenari».
Iturriak, sustraiak eta bideak
Batzuentzat, beren bizimodua da, baina askok modu altruistan egiten dute lan hori, denbora-pasa edo gustuko dutelako. Javier Etxeparek, adibidez, 200 iturritik gora egin ditu Araban. Egun batean lagunekin mendian zebilela egarriak zeuden, eta, iturririk ez zegoenez, egin egin behar zirela pentsatu zuen. Horregatik, porlana eta hodi puskak hartu eta hori egiten hasi zen.
Bizkaiko arotz baten istorioa bitxiagoa da. Koman egon ondoren, herrenka ibiltzen zen. Hildako sustrai bat mugitzen hasi zen, eta horrek energia eman eta berriro indarberritu zuela sentitu zuen. «Orain, berari emandako bizitza hori hildako sustraiei ematen die, artelan bilakatuz. Oso pisuak ziren batzuk oparitu zizkidan, eta sustraiek indarra eman diotela erakutsi nahi izan zidan autoraino garraiatuz».
Donostian nahiko entzuna da Uliako bideak norbaitek zaintzen dituela. Baina askok ez daki, Josetxo Mayorrek 20 urte daramatzala goizero mendiko bideak lehengoratzen. «Ulian orain dauden bide eder horietan ibiltzen direnetako askok ez daki nori esker ibil gaitezkeen hain bide ederrean. Eta lan hori Josetxori zor zaio», azaldu du Izagirrek.
Lehen, jaiegun eta asteburuetan Uliara igotzen zen; orain, hamar urte erretiratu zenetik, egunero, goizeko zazpietatik hamarretara bitartean. «Hark esan zidanez, txikitan han asko ibiltzen zen, eta, urteak pasatu ahala, ikusi zuen haurtzaroko bide horiek guztiak galduta zeudela, sasiak janda. Horrek amorrua eta pena handia eman zion, eta, horregatik, bere borondatez hasi zen bidea garbitzen».







2014/12/01

Abendu-urtarrileko saioak


Kaixo, lagunok!
Ikasturte honetako lehendabiziko saio sorta aurkeztu nahi dizuegu. Gogoratu saio irekiak direla eta doakoak! Interesa edukiz gero, izena eman honela: donostia@aek.org, 607596112.

Mundu zaintzaileak
Ander Izagirre kazetari eta idazleak Euskal Herriko zenbait txoko zaintzen dituzten pertsona anonimoen istorioak kontatuko dizkigu; «istorio miresgarriak», haren hitzetan. Adibidez, Uliako bideak zaintzen dituen lagunari buruz jardungo du. 


Abenduaren 16an, asteartea, Groseko Irrintzi-AEKn, 09:30ean.
Abenduaren 16an, asteartea, Amarako AEKn, 18:30ean.
Abenduaren 17n, asteazkena, Amarako AEKn, 09:30ean.
Abenduaren 18an, osteguna, Antiguako AEKn, 09:30ean.

Nestor Basterretxea
Koldo Mitxelenako bisita gidatu honetan Nestor Basterretxearen lan ibilbidea aztertuko dugu, batik bat Irdumendieta baserrian gordetzen diren obrak aurkeztuz. Aldi berean, Argentinan egindako Gurutze-Bidea, Euskal Herrian ikusi gabeko obra, eta hainbat diseinu, film... ikusi ahalko dira.


Urtarrilaren 15ean, osteguna, 10:00etan
Urtarrilaren 15ean, osteguna, 18:00etan

Suturak
San Telmo Museoko erakusketa honek Euskal Herriko artista garaikideen sormen lanak erakutsiko dizkigu. Artelan hauek gizarteko gertakari askorekin zerikusi estua dutela erakutsiko digu erakusketak. Gainera, erakusketako hainbat gairen inguruko irakurketa egingo dugu: generoa, gazteen emantzipazioa, bullyng-a, bandalismoa vs. artea, eta abar.


Abenduaren 11n, osteguna, 10:00etan

Kristaloterapia
Enara Goikoetxeak hainbat harriren propietateak zein diren erakutsiko digu, baita harriok gizakiarengan sortzen duten bibrazio eta eragina ere.

Urtarrilaren 12an, astelehena, Groseko Irrintzi-AEKn, 09:30ean.
Urtarrilaren 14an, asteazkena, Amarako AEKn, 19:30ean.



2014/06/19

"Nahi baduzu gozatu, hemengo produktuak dastatu!"

Hauxe da, bada, II. euslogan lehiaketaren eslogan irabazlea, Irrintzi-AEK euskaltegiko Lucia eta Libero ikasleen artean osatutakoa.


Libero Italian denez, Lucia bakarrik agertzen da argazkian AEKren ordezkariaren eskutik bertako labeldun produktuez betetako saskia jasotzen. Gainera, Irutxuloko Hitzaren urtebeteko harpidetza bana ere irabazi dute.

Bejondaiela!

Bigarren postuan gelditutako eslogana ere aipatu nahi genuke: "Osasuntsu elikatu, bertakoa kontsumitu".

Heldu den urtean beste gai bat jorratuko dugu. Zein gai? Zeuek proposatu!!!


2014/06/16

Euslogan zerrenda

Kaixo, neska-mutilok!

Hauxek dira zuok bidalitako esloganak. Mila esker parte hartzaile guztiei!
Ostegunerako jakingo dugu nor den irabazlea. Laister arte!



BERTAKO PRODUKTUEN KONTSUMOA SUSTATZEKO ESLOGANAK

Bertako elikagai, osasunez blai
Geureaz elikatu, bai osasuntsu
Zer jan hura izan,
Bertan elikatu!
Geureaz gozatu, bertakoa elikatu
Nongoa jan, hangoa izan
Bertakoa, bai osasuntsu
Geurea bai osasuntsu
Osasuntsu elikatu, bertakoa kontsumitu
Osasuntsu elikatu, bertakoa dastatu
Bertakoa bai sanoa
Bertakoaz bapo bai sano
Dasta bertakoa!
Bertakoa dasta!
Zapore ederra, osasuna bai ederra!
Gizarteak beti aukeratzen du produkturik hoberena, gurea, baserrikoa.
Etxean, lanean, kalean, sustraitik kanpo; beti produktu ekologikoa.
Gure produktuak dastatu eta Basque Country-z gozatu.
Gertukoa maite dugulako.
Gertukoa, gustukoa.
Mauka-mauka, bertakoak zaporerik badauka!
Geurea, hobea.
Bertakoari kosk! Gurea delako.
Zure esku dago bertakoari kosk egitea.
Bertakoa, bertatik bertara.
Bertakoek bertakoentzat.
Bertakoa, bai dotorea! Kolorea, usaina eta zaporea!
Gozo, gazi, garratz, mikatz... Bertako oro goxo!
Gure sustraietatik ahora. Bejondaizuela!
Bapo, bapo, hemengoa chapeau!
Bertatik bertara, baratzetik etxera.
Gure baratzetan prestatzen duguna, bai goxoa!
Guk produktua jarri eta zuek gustura jan.
Jan, edan eta disfrutatu. Ase hemengo produktuekin.
Hemengoarekin asetuz
Guretzat, gurekin jaio
Hemengo produktuak, aukerarik ederrena
Hurbilago, gozoago
Nahi baduzu gozatu, bertako produktuak dastatu!
Literaturaz, nekazaritzaz, eraikuntzaz, kalitateaz hemen ere badakigu
Gustukoa eta ezaguna, bertako produktua!
Bertako produktuak aukeratzean, sabela eta bihotza hurbil!
Geurearekin batera hazteko, bertakoa dugu erosteko!
EUSKERAZ MINTZATU, EUSKERAZ DAZTATU
GAU ETA EGUN EUSKARAZ DAZTATU NAHI DUT
KRESALA,XIRIMIRIA ETA BERTAKO JANARIA
EUSKERA BELARRI-AHO, LABEL AHO-SABEL
ETXEKO BEROTASUNARE EZEAN, IREKI LABEL POTEA!!!

2014/05/21

II. EUSLOGAN LEHIAKETA



Eusko label produktuez osatutako saski ederra eta Irutxuloko Hitzaren urtebeteko harpidetza doan irabazlearentzat!



Donostiako AEK-k euskarazko eslogan lehiaketa antolatu du “iriki atia, donostiar euskaldun eta euskara ikasleen topalekua”ren ekimen berri gisa.

Euskarazko sormena lantzea du helburu; izan ere, erdaraz pentsatutako goiburu edo esloganak nagusi baitira egun publizitate arloan.

Lehiaketa honetan, hain zuzen, bertako produktuen kontsumoa sustatzeko asmoa duten esloganak osatu beharko dira. 

Zer da eslogana edo slogana?
Jendearen arreta piztu eta erakartzeko esaldi laburra. Produktu edo ideia bati buruz pertsonek duten jarrera aldatu edo finkatzea du helburu.

Iazko lehiaketan euskararen erabilera bultzatzeko leloak asmatu behar ziren, eta ondokoak irabazi zuen: “elkarrekin mintza, euskararen giltza”.


OINARRIAK:
1.- 2014ko maiatzaren 26tik ekainaren 15era egongo da zabalik lehiaketan parte hartzeko epea, eta nahi adina eslogan bidali ahal izango dira.
2.- Esloganak euskara hutsean izango dira.
3.- Esloganek jatorrizkoak eta inon argitaratu gabeak izan behar dute.
4.- Gaia: esloganak bertako produktuen kontsumoa sustatuko du.
5.- Esloganak honako helbidera bidali behar dira: donostia@aek.org, honako datuak erantsiz: izen-abizenak, herria eta harremanetarako telefono zenbaki bat.
6.- Esloganak, bidali ahala, www.irikiatia.blogspot.com helbidean zerrendatuko ditugu.
7.- AEKren Donostiako euskaltegietako zuzendariek eta AEK-ko komunikazio arduradunek osatuko dute epaimahaia. Epaia ekainaren 21ean jakinaraziko dugu arestian aipatu blogaren bitartez, eta apelaezina izango da.
8.- Saria: irabazleak eusko label produktuez osatutako saskia irabaziko du; baita Irutxuloko Hitzaren urtebeteko harpidetza ere, irabazlea Donostian bizi
bada.
9.- Parte hartzaileek AEKri uzten diote, esklusiban, esloganak erabiltzeko eskubidea.
10.- Lehiaketa honetan parte hartzeak berez dakar oinarrion erabateko onespena.
Parte hartu! Sariak merezi du eta!


2014/05/14

maiatz-ekaineko saioak

Hauxe ikasturte honetako azken saio sorta!

Baina ez dira iriki atiaren azken ekitaldiak izango. Laster batean euslogan lehiaketaren berri izango duzue hemen bertan. Adi egon!


Amaren eskuak
Mireia Gabilondo zuzendariak parte hartuko du emanaldian, proiekzioa baino lehen filma aurkeztuz, eta ondoren, parte hartzaileen galderei erantzunez.

Gaztelaniaz azpititulatua!

Noiz: maiatzaren 15ean, osteguna, 18:30ean
Non: Groseko Okendo kultur etxean 

Keramika
"Txorizo" eta "Tximiko" tekniken bitartez buztina landuz hautsontziak, pitxerrak, katiluak... egingo ditugu, Saioa Ayalak lagunduta.

Noiz: ekainaren 10ean, asteartea, 09:15ean
Non: Antiguako AEK euskaltegian

Noiz: ekainaren 11n, asteazkena, 09:15ean
Non: Antiguako AEK euskaltegian

Noiz: ekainaren 12an, osteguna, 09:15ean
Non: Groseko Irrintzi-AEK euskaltegian 

Urak, ibaiak eta herriak erakusketa
San Telmoko erakusketa honek uraren inguruko mundu mailako hainbat gatazkaren giza alderdia eta uraren aldeko zenbait borroka ezagutzeko aukera eskaintzen du. Sei ardatz nagusiren inguruan antolatuta dago.
Gainera, San Telmon zehazki, zazpigarren ardatza gehitzen zaio, hain zuzen, tokiko bi kasurekin, erakusketa barruan bideo eta argazkien bidez integratzen direnak: Urumea ibaiaren kasua eta Jaizkibelen akuiferoen kudeaketa.

Noiz: maiatzaren 20an, asteartea, 10:00etan

Noiz: maiatzaren 22an, osteguna, 18:00etan

Noiz: maiatzaren 23an, ostirala, 10:00etan

Aldundiaren jauregira bisitan
Donostiako Gipuzkoa plazan dagoen Gipuzkoako Foru Aldundiaren Jauregia bertatik bertara ezagutzeko aukera dute aurrerantzean herritarrek. Izan ere, Jauregiaren historia, aretoak eta bertan gordetzen den ondareaz gain, eguneroko funtzionamendua ere ezagutzeko aukera ematen duen bisita gidatua eskaintzen du Aldundiak.

Noiz: ekainaren 3an, asteartea, bi aukera: 09:30ean eta 18:30ean

2014/03/11

martxo-apirileko saioak

Honatx hurrengo egitaraua!

Besteren artean, altxorrez altxor eta lorez lore ibiliko gara hilabeteotan...


-->
Zoriontsu izateko Adimen Entrenamendua
Gure burua hobeto ezagutu, onartu eta maitatzen laguntzen duen bide eraginkorra bilakatu den teknika bilduma da Entrenamendu Mentala. Honen guztiaren berri emango digu Urko Arozena adituak saio praktikoan.

Noiz: martxoaren 5ean, asteazkena, 09:15ean
Non: Groseko Irrintzi-AEK euskaltegian

Euskal altxorretan barrena
Arkaitz Astiazaran lasturtarra iazko udaberrian ia 5.000 kilometroko ibilaldia egin zuen bizikleta gainean Euskal Herrian zehar, eta emaitza Euskal altxorretan barrena izeneko ikus-entzunezkoan bildu du. Dokumentalaren helburua Euskal Herriko txokorik ederrenak erakutsi eta gure herrian bidaiatzeko ideiak ematea da, kirol jarduera, kultura eta euskararen sustapena uztartuta. Hiru saio:

Noiz: martxoaren 19an, asteazkena, 07:45ean Noiz: martxoaren 19an, asteazkena, 18:30ean
Non: Amarako AEK euskaltegian Non: Amarako AEK euskaltegian

Noiz: martxoaren 19an, asteazkena, 09:30ean
Non: Antiguako Lugaritz kultur etxean

Erlea eta erlezaintza
"Erlemundua" egitasmoko Aitor Zabalak bi emanaldi eskainiko dizkigu:

-Apiterapia: erlea gure sendagilea?
Noiz: martxoaren 26an, asteazkena, 09:30ean
Non: Amarako AEK euskaltegian

-Erlea eta erlazaintza: naturarentzat ezinbesteko sinbiosia.
Noiz: apirilaren3 an, osteguna, 09:30ean
Non: Antiguako AEK euskaltegian

Aquariumera bisitan
Itsasoaren oroimena: Kantauri itsasoak gure kondairetan, oroimenean eta iraganean izan duen garrantzia azpimarratzen da bisita gidatu honetan. Aquarioak ere bisitatuko ditugu, jakina.

Noiz: apirilaren 10ean, osteguna, 10:00etan

2014/02/21

Batukada saioak

Hau burrunba!

Bi ikusentzunezko hauetan Irrintzi-AEK euskaltegiko ikasleak ditugu erritmo dantzagarriak jotzen.

Zuen ustez nork jotzen dute hobeto, arratsaldeko saiokoek, goiko bideokoek, ala goizeko saiokoek, behekoek?


2014/02/05

Otsaileko iriki atia egitaraua

Hauxe duzue hurrengo egitaraua. Etorri eta gozatu!!


Zoriontsu izateko Adimen Entrenamendua
Gure burua hobeto ezagutu, onartu eta maitatzen laguntzen duen bide eraginkorra bilakatu den teknika bilduma da Entrenamendu Mentala. Honen guztiaren berri emango digu Urko Arozena adituak saio praktikoan.

Noiz: otsailaren 5ean, asteazkena, 09:15ean
Non: Antiguako AEK euskaltegian
eta
Noiz: otsailaren 11n, asteartea, 18:30ean
Non: Amarako Ikasbide kultur elkartean

Mihiluze jolasa
Ondo pasatzeko aukera izango duzu telebistako lehiaketa arrakastatsuan lagunartean jokatuta!

Noiz: otsailaren 20an, osteguna, 18:30ean
Non: Groseko Irrintzi-AEK euskaltegian

Batukada
Arantxa Vicedo Irrintzi euskaltegiko ikasleak eta Ainara Sarasketa lagunak batukada zertan datzan azaltzeaz gain, erritmo bat jotzen erakutsiko digute saiora eramandako musika tresnekin.

Noiz: otsailaren 17an, astelehena, 15:30ean
Non: Groseko Kortxoenea gaztetxean
eta
Noiz: otsailaren 18an, asteartea, 09:30ean
Non: Groseko Kortxoenea gaztetxean